Brazili shkatërron Zelandën, fiton edhe Argjentina

Brazili ka shkatërruar ekipin e Zelandës së Re duke e mposhtur me rezultat 5-0, në kuadër të Lojërave Olimpike, Pekini 2008, derisa Argjentina ka shënuar fitore minimale ndaj Australisë.
Brazili nuk pati probleme në ndeshjen e dytë të Lojërave Olimpike, duke mposhtur Zelandën me rezultat të thellë 5-0. Për ndryshim prej ndeshjes së parë, Ronaldinho tregoi një formë mjaft të mirë dhe shënoi dy gola për ekipin e tij.

Serinë e hapi Anderson me golin e minutës së 4-të, ndërsa pas më shumë se gjysmë ore lojë, ylli i Milanit, Pato, shënoi një gol të shkëlqyeshëm me kokë (34’).

Në pjesën e dytë të lojës, Brazili preku rrjetën kundërshtare edhe tre herë. Së pari Ronaldinho shënoi nga gjuajtja e lirë (55’), ndërsa në minutën e 61-të, arriti edhe golin e tij të dytë, kësaj here nga pika e bardhë. Rezultati u vulos në minutën e fundit, me golin e Sobis.

Argjentina shënoi fitore minimale, 1-0, ndaj Australisë, me golin e Lavezzit në minutën e 77-të. Fitore minimale ka shënuar edhe Kameruni ndaj Hondurasit. Nigeria ka mposhtur Japoninë me rezultat 2-1.