Berisha: Anëtarësimi i Ballkanit i kushton më pak BE-së

Kryeministri i Shqipërisë, Sali Berisha gjatë pjesëmarrjes në takimin informal të kryeministrave të vendeve të Evropës Juglindore, me temë Siguria në Evropën Juglindore në shekullin e 21, u shpreh se integrimi në BE për vendet e Ballkanit Perëndimor është një rikthim i tyre në gjirin e familjes të cilës ata i përkasin.
Përfshirja e këtyre vendeve,vijoi Kryeministri, që përbëjnë vetëm 1 për qind të GDP-së së BE-së dhe që kanë një popullsi më pak se gjysma e kolonisë, do t’i kushtonte më pak BE-së se sa mospërfshirja e tyre në të.

Berisha theksoi se Shqipëria është një vend në reformim të plotë të sistemit ekonomik e fiskal dhe ia ka dalë të vendosë disiplinën fiskale në vend. Për 3 vite me radhë, qeveria ka çuar në parlament një buxhet suplementar, 32 për qind i të cilit ka shkuar për rimëkëmbjen e infrastrukturës së prapambetur që ka trashëguar.

Të pranishëm në këtë takim ishin Kancelari i Austrisë Alfred Gusenbauer, kryeministri i Bosnje–Hercegovinës, Nikola Spiriq, kryeministri i Kroacisë, Ivo Sanader, kryeministri i Serbisë, Mirko Cvetkoviq, kryeministri i Maqedonisë, Nikola Gruevski, kryeministri i Malit të Zi, Milo Gjukanoviq, kryeministri i Rumanisë, Kalin Popesku, kryeministrja e Moldavisë, Zinaida Greceani, etj