KNO: Nuk ka marrëveshje me Kinën

Komiteti Ndërkombëtar Olimpik nuk e ka pranuar se ka rënë dakord për kufizimin e qasjes në internet të gazetarëve të huaj në Lojërat e Pekinit që nisin në 8 gusht.
Presidenti i Komitetit, Jacques Rogge tha se "nuk është bërë marrëveshje për të pranuar kufizimet".

Disa faqe interneti, delikate politikisht, u bllokuan më herët gjatë javës dhe disa zyrtarë të lartë olimpikë thanë se kishin qenë në dijeni.

Kina kishte premtuar se do të ofronte akses të pakufizuar.

Krerët e Komitetit kanë kërkuar të dinë se pse faqet delikate nga ana politike ishin bllokuar.

Gjatë ditëve të fundit duket se qasja në internet është lehtësuar.

Presidenti kinez, Hu Jintao, në një konferencë të rrallë për shtyp, i bëri thirrje medias ndërkombëtare që të mos i 'politizonte' Lojërat e Pekinit. /bbc/