Kamberi: Sa më shumë shqiptarë në institucionet komunale

Kryetari i Komunës së Bujanocit, Shaip Kamberi ka deklaruar se prioritet i tij është përfshirja e shqiptarëve në institucionet komunale.
Duke krahasuar angazhimin e shqiptarëve dhe serbëve në strukturat shtetërore në nivel lokal, siç janë policia, gjyqësia dhe inspektoratet e ndryshme, Kamberi ka thënë se ndryshimi është shumë i madh në favor të serbëve lokalë, përkundër faktit se janë më të pakët në numër.

Kamberi, në një prononcim për agjencinë “JUGpress” po ashtu ka shfaqur pakënaqësinë e tij për praninë e madhe të forcave të sigurisë dhe të ushtrisë serbe në Luginën e Preshevës.

"Qëndrimi im rreth kësaj mbetet i njëjtë. E dënoj praninë e këtyre forcave, sepse ato para investitorëve prezantojnë pamjen e një rajoni jostabil. Kur shohin se janë në numër të madh, investitorët nuk duan t’i investojnë paratë e tyre këtu, sepse konsiderojnë që situata e sigurisë është e keqe”, ka potencuar Kamberi