Aragones: Vila dhe Silva mund të përshtaten shumë mirë në futbollin italian

Ish-përzgjedhësi i kombëtares së Spanjës, Luis Aragones, i cili tashmë drejton skuadrën turke, Fenerbahçe, ka shprehur mendimin se David Vila dhe David Silva, do të mund të përshtateshin shumë mirë në Serie A.
"Vila mund të jap rezultat në cilëndo ligë, si në Itali, Spanjë apo Angli. Ai është një golashënues i shkëlqyeshëm. Golat janë specialiteti i tij. Ndërkohë, edhe Silva është futbollist i madh dhe do të përshtatej mjaft mirë në futbollin italian. Mendoj se të dy këta lojtarë do të ishin blerje të shkëlqyeshme për klubet italiane", ka theksuar Aragones. Më pas strategu 70-vjeçar spanjoll, ka folur edhe për Ronaldinjon dhe Murinjon, të cilët duket se e kanë ringjallur ligën italiane. "Murinjo? Vlerat e tij nuk mund të vihen në dyshim. Ai është një trajner i madh dhe mjafton të shikosh të arriturat e tij me Porton dhe Çelzin. Po ashtu edhe Ronaldinjo është një nga futbollistët më të mirë në botë dhe do t'i jap një ngjyrë tjetër kampionatit italian".