Prishtina, të dielën miqësore me Osnabrykun

Skuadra kampione në fuqi e Kosovës, Prishtina, të dielën do të zhvillojë një tjetër ndeshje miqësore ndërkombëtare jashtë vendit. Pas sfidave me Ofenbahun, Vinterturin dhe Shaufhausenin, skuadra bardhekaltër do të vihet përballë skuadrës së Bundesligës së dytë gjermane, Osnabryk.
Ndeshja do të zhvillohet të dielën në stadiumin e Osnabrykut, në orën 16:00. “Ky është vetëm një vazhdim i projektit të KF ‘Prishtina’ dhe një mënyrë që t’i bëjmë presion FIFA-s dhe UEFA-s që të na pranojnë sa më shpejt në gjirin e tyre”, ka theksuar kryetari i KF “Prishtina”, Remzi Ejupi, i cili ka shprehur shpresën se skuadra bardhekaltër do ta përfaqësojë futbollin kosovar në mënyrën më të mirë të mundshme. Ndërkohë trajneri i skuadrës Afrim Tovërlani, ka thënë se koha për t’u përgatitur për këtë ndeshje ka qenë shumë e vogël. “Koha për t’u përgatitur ka qenë shumë e shkurt. Natyrisht se ende nuk kemi arritur në formën e duhur, por ne nuk udhëtojmë atje me ambicie që ta fitojmë gjithqysh këtë ndeshje. Synimi ynë është që ashtu si në tri ndeshjet e kaluara, edhe këtë herë të lëmë një përshtypje sa më të mirë para opinionit gjermanë”, ka thënë Tovërlani