Paditja e Al Bashirit ende në pritje

Afrika e Jugut ka thënë se një numër gjithnjë e më i madh vendesh dëshirojnë që Gjykata Ndërkombëtare Penale të pezullojë veprimet për të paditur presidentin e Sudanit, Omar Hassan al-Bashir.
Ambasadori afrikano-jugor në OKB, Dumisani Kumalo, tha se vonesat do të jepnin një shans.

Mandati aktual i misionit paqerujtës të OKB-së dhe Bashkimit Afrikan skadon në fund të kësaj jave, por Këshilli i i Sigurimit pritet ta zgjasë atë.

Këshilli i Sigurimit i OKB-së është ende i ndarë përsa i takon përpjekjeve afrikane për të ndaluar Gjykatën Penale të padisë Bashirin.

Dy javë pasi prokurori i Gjykatës Ndërkombëtare Penale i kërkoi gjykatësve të nxjerrin një fletë-arresti për presidentin e Sudanit, që e akuzon për krime lufte dhe gjenocid në Darfur, brenda Këshillit të Sigurimit filloi të ndihej jehona e vendimit.

Bashkimi Afrikan i ka kërkuar Këshillit që të ndërhyjë dhe të ushtrojë pushtetin ligjor për të vonuar një vit procedurat e Gjykatës Ndërkombëtare Penale.

Nëse presidenti i Sudanit paditet kjo do të pengonte përpjeket për të sjellë paqe në Darfur, thonë udhëheqësit afrikanë.

SHBA-ja dhe vendet evropiane janë kundër. Ato thonë se rinovimi i mandatit të paqeruajtësve nuk duhet të mbahet peng për paditjet në të ardhmen nga ana e Gjykatës.

Diplomatët thonë se një kompromis i mundshëm është që Këshilli i Sigurimit të marrë parasysh kërkesën e Bashkimit Afrikan dhe ta shtyjë paditjen për një datë tjetër. /bbc/