Janjiq: Serbisë i nevojitet strategjia dalëse për Kosovën

Koordinatori i Forumit për marrëdhënie etnike Dushan Janjiq ka vlerësuar sot se diplomacia serbe duhet të përgatitet shumë seriozisht për Asamblenë e Përgjithshme të OKB-së, respektivisht të ndryshojë planin e veprimit për Kosovën dhe të rivlerësojë “mosekzistimin e strategjisë dalëse".
"Beogradi duhet të zhvillojë strategjinë dalëse, sepse definitivisht për pak muaj do të humb çfarëdo kontakti dhe kontrollin mbi Kosovën", ka thënë Janjiq për agjencinë serbe të lajmeve Tanjug, me rastin e seancës së mbrëmshme të OKB-së për Kosovën.

Për paraqitjen e shefit të diplomacisë serbe Vuk Jeremiq në këtë seancë Janjiq ka thënë se “ka qenë maksimumi i tij në rrethana shumë të pakëndshme".

Jeremiq, sipas Janjiqit, “i armatosur” me politikë aq të improvizuar shtetërore nuk do të mund të paraqitet në Asamblenë e Përgjithshme të Organizatës së Kombeve të Bashkuara.

Janjiq thotë se adresimi i Serbisë tek Gjykata ndërkombëtare e drejtësisë për mendimin e tyre mbi shpalljen e pavarësisë së Kosovës mund të nxis hapjen dhe legjitimimin e temës së pavarësisë së Kosovës në Asamblenë e Përgjithshme të OKB-së.

Beogradi, vlerëson Janjiq, nuk mund të ndjek planin e zhvilluar dhe politikën proaktive të perëndimit dhe Sekretarit të Përgjithshëm të OKB-së të cilët mbështesin ndryshimin e realitetit në terrenin e Kosovës.

Sipas tij rikonfigurimi i pranisë ndërkombëtare në Kosovë është varianti dalës edhe për UNMIK-un edhe EULEX-in, e edhe për Rusinë, sepse derisa flitet për rikonfigurimin, bëhet fjalë për Rezolutën 1244.

"Ka pasur hapësirë për ndryshime, por në fillim të këtij viti, më së voni deri në mars, e Rusia ka tentuar të parandalojë këtë mendim të Sekretarit të Përgjithshëm me anë të letrave dhe deklaratave publike të Lavrovit se rikonfigurimi në fakt është mënyrë e fshehtë për tu ndryshuar Rezoluta 1244, të futet EULEX, por nuk ka mundur të bëj politikë proaktive, sepse nuk e ka pasur, e as sot nuk e ka Beogradin pas vetes", ka vlerësuar Janjiq