Parlamenti maqedonas zgjodhi Qeverinë e re

Parlamenti i Maqedonisë zgjodhi të shtunën Qeverinë e re të përbërë nga koalicioni midis VMRO-DPMNE dhe Bashkimi Demokratik për Integrim (BDI).
Deputetët pas prezantimit të programit qeveritar nga mandatari Nikolla Gruevski dhe pas diskutimeve të deputetëve me 77 vota për dhe asnjë kundër i dhanë besimin Qeverisë së re. Kabineti qeveritar i kryeministrit Nikolla Gruevski përbëhet nga 21 ministra, prej të cilëve 6 i takojnë partisë shqiptare Bashkimi Demokratik për Integrim.

Para votimit të Qeverisë, në fjalimin e tij, kryetari i BDI-së, Ali Ahmeti deklaroi se sot votohet për një Qeveri të politikanëve që kanë arritur sukses të tejkalojnë të gjitha paragjykimet dhe stereotipet.

Sipas tij, kjo Qeveri do të ketë të gjitha mundësitë për të qenë stabile, e suksesshme, efikase dhe e dobishme për të gjithë qytetarët.

“Koalicionin që po e promovojmë tregon se ne e krijuam kushtin e parë për rritjen e besimit dhe mirëkuptimit midis bashkësive etnike. Ky moment shënon shansin për të krijuar një klimë të kohezionit të brendshëm, stabilitet politik dhe ndërtim të institucioneve funksionale”, deklaroi Ahmeti

Ish-ambasadori rus në Serbi Alexander Alekseyev ka deklaruar se “Serbët e shqiptarët herët a vonë do të duhet të ulen pranë tavolinës negociuese” sepse, sipas tij, situata aktuale në Kosovë nuk po zhvillohet ashtu si do të donin ata që e kanë menduar tërë këtë.
"Nga një situatë e tillë duhet të dilet, e pos negociatave nuk ka rrugëdalje tjetër”, ka theksuar Alekseyev në një intervistë për gazetën serbe “Novosti”.

"Deri më tani nuk ka pasur negociata të vërteta. Vazhdimi i negociatave do të jetë në dobi edhe të atyre të cilët tentojnë të marrin përgjegjësinë për Kosovën", ka thënë diplomati rus.

Sipas Alekseyev, zhvillimi i situatës në Kosovë është duke shkuar drejt asaj që quhet “ngrirje konflikti".