Bosnjës e Hercegovinës i kërcënohet shpërbërja

Bosnja e Hercegovina është më afër se kurrë shpërbërjes që prej fundit të luftës, derisa Bashkimi Evropian duhet të bëj më shumë për të evituar ndarjen e mundshme, ka shkruar në një artikull për gazetën “Observer” ish-përfaqësuesi i lartë për Bosnjën e Hercegovinën, Paddy Ashdown.
"Radovan Karaxhiq më në fund është rrugës për në Hagë. Por ndarja e Bosnjës për të cilën ai ka ëndërruar tani është më afër realizimit sesa ndonjëherë më parë që prej se ka qenë në arrati", thekson Ashdown.

Ai ka tërhequr vëmendjen se Republika Serbe e Bosnjës ka themeluar institucione paralele me shtetin dhe se është duke punuar në ndarjen e BeH-së.

Ashdown thotë se kryeministri i Republikës Serbe Millorad Dodik "tani në mënyrë agresive është duke anuluar dekadat e reformave" dhe shfrytëzon autonominë e cila i është ofruar me Marrëveshjen e Dejtonit për të “rrezikuar Bosnjën ashtu si është paraparë në Dejton".

BE-ja do të duhej të shfrytëzojë aspiratat e BeH-së për anëtarësim në Union si levë me anë të së cilës do të mbështetej pushteti i mesëm në Sarajevë.

"Brukseli duhet ... t’i kundërvihet tentimeve për minim të shtetit të Bosnjës e Hercegovinës, duhet të këmbëngul në reformat kushtetuese të cilat Bosnjën do ta bënin më të efektshme dhe të cilat do t’i kundërviheshin korrupsionit", ka theksuar Ashdown