Rexhepi shpreson se KFOR-i do ta përfundojë ujësjellësin në Suhadoll

Kryetari i Mitrovicës, Bajram Rexhepi, ka shprehur besimin se KFOR-i do ta kryej pjesën e mbetur të kanalit të ujësjellësit në Suhadoll, përkundër pengesave që janë duke bërë banorët serbë. “I vetmi solucion për zgjidhjen e këtij problemi ka qenë që KFOR-i ta merr përgjegjësinë për ta përfunduar këtë projekt human, prandaj kemi besimin se edhe do ta bëj një gjë të tillë”, tha ai sot në takimin e Komitetit për Siguri.
Kryetari Rexhepi tha se komuna ka vënë në dispozicion mjetet e nevojshme për përfundimin e atij projekti, si gypat, rërën dhe gjëra të tjera të nevojshme në aspektin teknik.

“Ne presim që bisedimet në mes të zyrtarëve të UNMIK-ut dhe serbëve të përfundojnë, dhe, KFOR-i të filloi punimet sa më parë, mirëpo nëse ka të tillë që këmbëngulin për mosfillimin e punës, atëherë KFOR-i duhet të tregoj vendosmëri”, ka thënë Bajram Rexhepi.


Rexhepi: Kërkesat e qytetarëve për largimin e maunave me vaj disulfurik, janë të arsyeshme

Në takimin e Komitetit për Siguri sot është folur sërish edhe për çështjen e maunave me vaj disulfurik që janë vendosur në Mitrovicë, si dhe për protestat e banorëve për largimin e tyre. Kryetari Rexhepi përsëriti se kërkesat e banorëve janë legjitime, meqë ata janë të shqetësuar për shëndetin e tyre.
Ai tha se vendosja e tyre ka qenë gabim i autoriteteve qendrore, përderisa komuna ka reaguar dhe ka kërkuar largimin apo asgjësimin e atyre materieve në ditën e parë që janë vendosur në Parkun Industrial “Trepça”.

Kryetari Rexhepi shprehu gatishmëri që në çdo kohë të takohet më një delegacion të protestuesve edhe pse komuna nuk është e involvuar në këtë çështje që është në përgjegjësi të autoriteteve qendrore.