Sejdiu dhe Çeku më të preferuarit

Në bazë të një hulumtimi të "Index Kosova", të realizuar në qershor të këtij viti, presidenti Fatmir Sejdiu dhe ish-kryeministri Agim Çeku vazhdojnë të mbesin liderët më të përkrahur nga qytetarët e Kosovës – të pasuar nga kryeministri Hashim Thaçi dhe lideri i AAK-së, Ramush Haradinaj.
Rënie të konsiderueshme në përkrahje kanë shënuar lideri i AKR-së, Behgjet Pacolli dhe ish-lideri i ORA-s, Veton Surroi.

Preferencat aktuale votuese të qytetarëve të Kosovës tregojnë se është rritur numri i atyre që nuk do të votonin për asnjë parti, përderisa ka rënë numri i atyre që janë të papërcaktuar. Aktualisht, rreth 71% e qytetarëve janë të përcaktuar se për cilën parti do të votonin.

Koalicioni qeveritar PDK-LDK duket se i ka përforcuar pozicionet e këtyre dy partive në sytë e elektoratit kosovar. Aktualisht për PDK-në do të votonin 42 % ndërsa për LDK-në 29 % e votuesve.

Në anën tjetër, lëvizjet në mesin e opozitës janë po ashtu të konsiderueshme: AAK ka shënuar ngritje në 16 %, përderisa AKR ka rënën 5 % dhe LDD në 4%. Gjithashtu, edhe ORA ka shënuar rënie të madhe në 1 %, përderisa PSD është ngritur në 1 %.

Pas shpalljes së pavarësisë së Kosovës, tani problem mbizotërues në Kosovë mbetet papunësia. Problemet tjera, por që bien dukshëm nën hijen e problemit të papunësisë, janë:rryma, rindërtimi i ekonomisë/infrastrukturës, varfëria dhe Mitrovica, thuhet në publikimin më të ri të INDEX Kosova, në lidhje me politikën në Kosovë.

Sipas qytetarëve të Kosovës, tri prioritetet më të rëndësishme me të cilat do të duhej të merrej Qeveria e Kosovës janë: sektori i energjisë, sundimi i ligjit dhe sistemi shëndetësor. Në mesin e prioriteteve të tjera,përmenden edhe sistemi arsimor, shëndeti publik, si dhe programet e ndihmave sociale