Malta në mënyrë të pashpjegueshme refuzon të njoh pavarësinë e Kosovës?

Malta në mënyrë të pashpjegueshme mbetet një nga shtatë vendet anëtare të BE-së e cila ende refuzon të pranojë shpalljen e pavarësisë së Kosovës, së bashku me Spanjën, Qipron, Portugalinë, Sllovakinë, Greqinë dhe Rumaninë, shkruan sot gazeta lokale malteze “The Malta Independent Online”.
Arsyeja pse Malta është mbajtur fuqishëm për pozicionin e vet aq gjatë është për të çuditur, derisa ministria e Punëve të Jashtme nuk ka qenë në gjendje të jap përgjigje në pyetjet e bëra nga kjo gazetë qysh prej fillimit të majit të këtij viti.

Derisa 20 nga 27 vendet anëtare të BE-së kanë arritur të vërtetojnë pavarësinë e Kosovës, që prej shpalljes së saj afro pesë muaj më parë, Malta, për arsye të panjohura, deri më tani është përmbajtur.

Në një deklaratë të lëshuar menjëherë pas shpalljes së pavarësisë nga Kuvendi i Kosovës, ministri i Punëve të Jashtme të Maltës në atë kohë, Michael Frendo, kishte thënë në një deklaratë se, “Sa i përket njohjes së pavarësisë, që është një çështje e ndarë e cila i mbetet shteteve anëtare individualisht, Malta do të marr një vendim në një kohë të përshtatshme”.

Malta më herët kishte kundërshtuar njohjen e një Kosove të pavarur pa një rezolutë nga Këshilli i Sigurimit i Kombeve të Bashkuara.