Mosnjohja e pasaportave të Kosovës do të ishte ide e marrë

Ministri malazias i Punëve të Brendshme, Jusuf Kalamperoviq ka përsëritur qëndrimin se Mali i Zi do t’i njohë pasaportat e Kosovës. Ai madje ka thënë se do të ishte ide e marrë që qytetarëve të Kosovës t’u pamundësohet hyrja në Mal të Zi.
"UNMIK i njeh këto dokumente. Si anëtar të KB-së, ne e respektojmë këtë gjë”, ka thënë ai, duke shtuar se njohja e pasaportave të Kosovës nuk do të thotë edhe njohje të pavarësisë së Kosovës.

"Njëqindmijë turistë kosovarë vijnë çdo vit në Mal të Zi. Ne do t’i humbnim ata”, ka thënë Kalamperoviq. Ai po ashtu ka shkuar se shumë mall hyn përmes Malit të Zi drejt Kosovës, qoftë ai transport hekurudhor apo rrugor.

"Mali i Zi kurrë nuk i ka mbyllur kufijtë drejt Kosovës. Këtë gjë nuk e ka bërë as në kohët më të vështira”, ka shtuar Kalamperoviq.

Ai ka përkrahur qëndrimin e Maqedonisë, e cila i njeh pasaportat e Kosovës, por jo edhe pavarësinë e saj. Kalamperoviq ka vlerësuar se “jeta duhet të vazhdojë”. Njohja e pavarësisë së Kosovës, sipas tij momentalisht nuk është temë në Mal të Zi. “Këtë çështje e kemi shtyrë për një kohë të caktuar. Nuk pres zgjidhje në periudhën vijuese”, ka shpjeguar ai.

Kroacia do t'i njohë pasaportat e reja të Kosovës

Edhe Ministria kroate e Punëve të Jashtme dhe Integrimeve Evropiane ka bërë të ditur se do t'i njohë pasaportat e reja të Kosovës. Ministria thekson se Qeveria kroate në mars e ka njohur Kosovën si shtet të pavarur dhe sovran, andaj konform me këtë nuk ka pengesë për njohjen e dokumenteve të udhëtimit që i lëshojnë organet kompetente të Kosovës.

Qeveria kroate edhe më herët ka shprehur gatishmërinë që të zhvillojë marrëdhënie të gjithanshme bashkëpunimi me Kosovën dhe konsideron se ky bashkëpunim me asgjë nuk rrezikon marrëdhëniet e mira me cilindo shtet në rajon, theksohet në një komunikatë.

Ndërkaq ditë më parë, edhe Maqedonia, e cila ende nuk e ka njohur pavarësinë e Kosovës, ka bërë të ditur se do t’i njohë pasaportat e Kosovës.
Daqiq: Serbia nuk do t’i njohë pasaportat e Kosovës
Zëvendëskryeministri serb dhe ministri i Punëve të Brendshme, Ivica Daqiq, ka thënë sot, e premte, në Vjenë se Serbia nuk do t’i njohë pasaportat e Kosovës.

Pas paralajmërimeve të Kroacisë dhe Malit të Zi se do t’i pranojnë pasaportat e Kosovës, Daqiq ka thënë se këto janë çështje e politikës së tyre shtetërore në lidhje me shpalljen e njëanshme të pavarësisë, që disa shtete e kanë pranuar.

“Për sa i përket qeverisë së Serbisë dhe MPB-së, ne nuk do t’i pranojmë pasaportat e të ashtuquajturit shtet të Kosovës. Asnjë qytetar serb, i cili posedon pasaportë të Kosovës, nuk do të lejohet të kalojë në vendkalimet kufitare në Serbi”, ka thënë Daqiq.

Masa ndëshkuese janë paralajmëruar edhe për shtetasit e huaj.

"Të gjithë shtetasit e huaj që kanë vula të Republikës së Kosovës ato do t’u anulohen dhe mbi to do të vendoset vula e republikës së Serbisë”, ka thënë ai.