Qiro Bllazheviq përzgjedhës i ri i Bosnjë e Hercegovinës

Trajneri i njohur kroat, Miroslav Qira Bllazheviq, i cili në vitet e 80-ta drejtoi skuadrën e Prishtinës është emëruar zyrtarisht përzgjedhës i Përfaqësueses së Bosnjë e Hercegovinës, duke nënshkruar kontratë dyvjeçare me federatën boshnjake.
Bllazheviq është shprehur optimist sa i përket suksesit të përfaqësueses se Bosnjë e Hercegovinës në kualifikimet për Botërorin 2010. “Detyra e trajnerit kërkon dëshmim të vazhdueshëm, kurse dëshmia e vetme në këtë punë është rezultati i mirë. Shpresoj se në kualifikime do të tregohemi të suksesshëm”, ka shtuar Bllazheviq, i cili debutimin me Bosnjë e Hercegovinën do ta ketë më 20 gusht në Zenicë, në ndeshjen miqësore ndaj Bullgarisë. Strategu 73-vjeçar kroat gjatë karrierës së tij të gjatë si trajner krahas Prishtinës, ka drejtuar 18 klube në Zvicër, Greqi, Kroaci, si dhe ka drejtuar kombëtaret e Zvicrës, Iranit dhe Kroacisë. Me përfaqësuesen kroate ai arriti në vendin e tretë në Botërorin 1998.