Ferati: Serbët rrezikojnë të vonojnë decentralizimin

"Serbët rrezikojnë në vonesat që krijojnë. Ne do të punojmë, por nëse serbët do të rezistojnë edhe më tutje dhe do të kërkojnë kohë, do të jetë humbje kohe për ta", tha ministri i Pushtetit Lokal, Sadri Ferati, në një intervistë për Radion Evropa e Lirë.
Pretendimet e strukturave serbe për instalimin e rezultateve nga zgjedhjet jolegale janë të papranueshme për ministrin Ferati.

“Tani kemi pretendime që të instalohen edhe rezultate nga zgjedhjet jolegale, që ne jemi absolutisht kundër dhe nuk do të lejojmë që asnjë bashkëpunim edhe i strukturave ndërkombëtare të jetë me ato struktura, ngase nuk ekziston asnjë mundësi që ato të implementohen, as instalimi i institucioneve serbe në Kosovë dhe as implementimi i çfarëdo rezultateve dhe ligjeve serbe në Kosovë”.

Sipas Feratit, mosbashkëpunimi i palës serbe mund të sjellë vështirësi dhe humbje kohe pa nevojë.

“Por, nëse serbët do të rezistojnë edhe më tutje dhe do të kërkojnë kohë, pra do të jetë një humbje kohe për ata, që ne konsiderojmë se është për keqardhje, sepse janë qytetarët e Kosovës, institucionet e Kosovës që sa më shpejt dëshirojnë një Kosovë me institucione shumë funksionale dhe të fuqishme dhe me një kualitet jete për të gjithë qytetarët e saj”.

Pyetjes rreth fillimit të bisedimeve për krijimin e komunës veriore në Mitrovicë dhe më pastaj edhe të bordit të përbashkët, siç parashihet me pakon e Ahtisaarit, ministri Ferati i përgjigjet negativisht.

“Jo, unë nuk jam në dijeni se është duke u biseduar. Mund të ketë kontakte me qytetarë dhe liderë për të parë se si është disponimi momental, por në biseda konkrete unë nuk jam i përfshirë dhe nuk jam në dijeni”. /REL/