Lampard do të jetë futbollisti më i paguar në Angli

Mediat angleze kanë shkruar se ekipi i Chelseat është i gatshëm t’ia plotësojë kërkesat Frank Lampard dhe t’i ofrojë pagë javore prej 150 mijë funtesh (189 mijë euro).
Lajmin e bën të ditur Daily Express, që zbulon se anglezi do të jetë lojtari më i paguar në Premierligë, pasi që blutë janë të gatshëm t’i përballojnë kërkesat e tij dhe t’i ofrojnë marrëveshje pesëvjeçare të vlefshme 39 milionë funte (49 milionë euro).

Mesfushori 30 vjeçar ka edhe 12 muaj marrëveshje dhe negociatat për marrëveshjen e re, po zhvillohen tashmë dy vite.

Klubi nuk dëshironte t’i plotësonte kërkesat e lojtarit, por pas deklaratave të presidentit të Interit, Massimo Moratti, se ka arritur pajtim me lojtarin për transferim dhe paralajmërimet se ai mund të nënshkruajë që nga 1 janari, e kanë nxitur udhëheqjen e Chelseat t’ia plotësojë kërkesat mesfushorit.

Edhe drejtori sportiv i bluve, Peter Kenyon, ka thënë se Chelsea tashmë e ka të gatshme ofertën, dhe se ai pret që Lampard ta pranojë, pasi që ‘me të praktikisht mund ta mbyll karrierën në Chelsea’.