Kenion: Çelzi nuk ka bërë dhe nuk do të bëjë ofertë për Kakanë

Drejtori ekzekutiv i Çelzit, Piter Kenion ka hedhur poshtë zërat e mediave sipas të cilëve klubi londinez i ka bërë një megaofertë Milanit për sulmuesin brazilian, Kaka, duke bërë të ditur se ka pak gjasa që të ndodh një veprim i tillë i klubit londinez.
Mediat italiane në fundjavë kanë bërë të ditur se Çelzi ka ofruar 100 milionë euro për Kakanë, kurse këto zëra i ka konfirmuar më pas edhe zëvendësdrejtori i Milanit, Adriano Galiani. Megjithatë, Piter Kenion, i cili ndodhet së bashku me skuadrën në Kinë, ka theksuar se nuk dinë asgjë rreth ofertës për sulmuesin brazilian. "Ne nuk kemi bërë asnjë ofertë për Kakanë. Kam lexuar në media se drejtuesit e Milanit kanë pohuar se Kaka nuk është në shitje, por unë dua të rikujtojë se ne nuk kemi bërë asnjë ofertë. Nuk ka arsye të bisedojmë për diçka që ata nuk dëshirojnë, por as ne nuk jemi përpjekur të hyjmë në bisedime", ka pohuar Kenion.