Vdes ish-kreu i SHIK-ut, Bashkim Gazidede

Ish-kreu i SHIK nga viti 1992 deri në vitin 1997, ka ndërruar jetë të shtunën pasdite nga një sëmundje e rëndë. Bashkim Gazidede ka vdekur në Tiranë pas kthimit të tij nga Italia ku ka qenë për një periudhë për kurimin e sëmundjes së rëndë.
Shqetësimet shëndetësore të Gazidedes kanë nisur të viheshin re kohë më parë, ndërsa është përkrahur vazhdimisht nga qeveria shqiptare me fonde për kurimin e tij jashtë shtetit.

Bashkim Gazidede u largua nga Shqipëria në vitin 1997 dhe u rikthye në vitin 2005. Gazidede u konsiderua si një nga njerëzit më besnik të presidentit të asaj kohe, Sali Berisha, aktualisht kryeministër.

Gazidede u akuzua nga opozita e majtë se përdori SHIK-un e asaj kohe për veprime represive. Emri i Gazidedes lidhet me shumë ngjarje të bujshme ende të pazbardhura nga drejtësia shqiptare. Ai është akuzuar edhe për ngjarjen e zhdukjes së biznesmenit shqiptaro-maqedonas Remzi Hoxha nga SHIK-u në vitin 1994, kohë në të cilën Gazidede ka qenë kreu i SHIK.

Për këtë Bashkim Gazidede është akuzuar nga familjarët e biznesmenit të zhdukur se ka qenë autori i rrëmbimit të Remzi Hoxhës.

Në trazirat e pranverës së vitit 1997, Bashkim Gazidede mori drejtimin e operacioneve ushtarake për të shtypur revoltat që lindën pas rënies së firmave piramidale. Po në vitin 97 ai u largua nga Shqipëria duke qëndruar i fshehur për 8 vjet.

Me ardhjen në pushtet të Partisë Demokratike në vitin 2005 Gazidede rikthehet në Shqipëri dhe emërohet zv/drejtor i Hipotekave edhe pse nuk e ushtroi këtë detyrë për shkak të sëmundjes së rëndë.

Muajt e fundit të jetës, Bashkim Gazidede i kaloi në një spital të Italisë. Bashkim Gazidede vdiq në moshën 56 vjeçare në Tiranë