Presidenti Topi i dërgon një mesazh presidentit Bush

Presidenti i Republikës së Shqipërisë, Bamir Topi i ka shprehur nëpërmjet një mesazhi mirënjohjen e popullit shqiptar presidentit të Shteteve të Bashkuara, George Ë. Bush, me rastin e nënshkrimit të Protokollit të anëtarësimit të Shqipërisë në Aleancën e Atlantikut të Veriut.
Në letrën e presidentit Topi, ndër të tjera thuhet: “Më lejoni që, në emër të popullit shqiptar dhe në emrin tim personal, t’Ju shpreh mirënjohjen dhe falënderimet më të përzemërta për mbështetjen e vazhdueshme e të gjithanshme që i jepni Shqipërisë dhe popullit shqiptar!”

“Nënshkrimi nga ana Juaj e Protokollit të anëtarësimit të Shqipërisë në NATO, i mbështetur unanimisht nga Senati i Shteteve të Bashkuara të Amerikës, rikonfirmoi besimin se vendi juaj mbetet aleati më i madh dhe i besueshëm i Shqipërisë”, thekson Topi në letrën e tij.

Ai po ashtu ka potencuar se shpreh bindjen se, vendimi i presidentit Bush inkurajon proceset demokratike në Shqipëri e në të njëjtën kohë forcon vullnetin e popullit të saj për të ndërtuar një shtet të së drejtës, të lirisë dhe të respektit ndërinstitucional, një shtet të aftë për përballuar me sukses sfidat që e ardhmja i rezervon.

“Duke Ju falënderuar edhe një herë, si dhe duke Ju siguruar për ndjenjat e thella të miqësisë së popullit shqiptar”, thuhet në mesazhin e Topit.