Siria dënon sulmin e pretenduar amerikan

Siria thotë se katër helikopterë amerikanë kanë kryer një sulm mbi një fshat tetë kilometra brenda territorit në kufi me Irakun.
Ministria e Jashtme siriane tha se tetë civilë u vranë në sulmin që duket se kishte në shënjestër një kantier ndërtimi.

Siria ka protestuar ndaj diplomatëve amerikanë në kryeqytetin Damask për atë që e quajtën "një veprim agresiv". Nuk ka patur asnjë koment zyrtar nga autoritetet amerikane.

Nëse pretendimet e sirianëve vërtetohen, ky është i pari inkursion amerikan në territorin sirian prej Irakut.

Ai vjen në kohën kur administrata e Bushit po i afrohet përfundimit të mandatit dhe kur aleatët evropianë si Britania dhe Franca janë duke u përpjekur të zgjerojnë lidhjet e tyre me Damaskun. /bbc/