Presidenti Bush niset për një turne aziatik

Presidenti George Bush është nisur për një turne në tri vende të Azisë, gjatë të cilit do të marrë pjesë edhe në ceremoninë e hapjes së Lojërave Olimpike në Pekin.
Para se të mbërrijë në Kinë, presidenti Bush do të ndalet në Korenë e Jugut dhe Tajlandë ku do të diskutojë mbi çështje tregtare dhe përpjekjet për t’i dhënë fund programit bërthamor të Koresë së Veriut.

Zyrtarë të Shtëpisë së Bardhë thonë se presidenti Bush dhe presidenti koreano jugor Mi Munk Bak do të takohen nesër. Ndihmësit e tij thonë se në Tailandë, presidenti do të mbajë një fjalim që do të jetë një vlerësim i politikës amerikane në Azi gjatë periudhës së tij si president.

Gjatë qëndrimit në Bangkok, presidenti Bush do të njihet nga afër me përpjekjet e ndihmave për viktimat e ciklonit në Birmaninë fqinje dhe do të takohet me veprimtarë birmanezë. Zonja e parë, Laura Bush ka në plan të shkojë në kufirin tailandezo-birmanez për të vizituar një kamp refugjatësh dhe një klinikë. /VoA/