Izraeli strehon mbështetësit e Fatahut

Autoritetet izraelite thonë se gati 200 anëtarë të një klani që mbështet fraksionin Fatah të presidentit palestinez, Mahmoud Abbas janë lejuar që të hyjnë në Izrael pas shpërthimit të luftimeve të ashpra me rivalët e tyre të Hamasit në Rripin e Gazës.
Një zëdhënës i ushtrisë izraelite tha se disa prej tyre kishin dorëzuar armët kur i ishin afruar kalimit në Gazë. Personat e plagosur janë çuar për kurim në spitalet izraelite.

Të dyja grupet fajësojnë njëra-tjetrën për luftimet, gjatë të cilave kanë gjetur vdekjen të paktën nëntë vetë. Njoftimet bëjnë të ditur se përplasjet shpërthyen gjatë një operacioni të Hamasit në një vend që konsiderohet si bastioni i një klani vendas pro Fatahut.

Hamasi akuzon mbështetësit e Lëvizjes Fatah se janë përgjegjës për sulmet me bomba javën e kaluar, gjatë të cilave vdiqën pesë anëtarë të Hamasit dhe një vajzë e vogël. Fatah i mohon akuzat.

Izraeli e hapi kufirin kur Egjipti dhe presidenti Abbas kërkuan që mbështetësit e Fatahut të lejoheshin që të hynin. Ministri izraelit i Mbrojtjes, Ehud Barak tha se Izraeli kishte pranuar për arsye humanitare. /bbc/