Berisha: Rama të jap llogari për fondet e dhuruara nga Qeveria

Kryeministri Sali Berisha ka vijuar me akuza të ashpra ndaj kreut socialist, Edi Rama. I gjendur në Vorë për inaugurimin e një shkolle 9-vjeçare, Berisha akuzoi Ramën se ka abuzuar me fondet e Qeverisë.
“Edvin Rama të dalë dhe të tregojë se ku i ka çuar fondet e qeverisë për 18 shkolla. Unë do të marrë pjesë edhe në inaugurimin e Sharrës, pasi është një investim i qeverisë. Edvin Rama le të vijë edhe atje”, tha Berisha teksa theksoi se Rama inauguron investime të Qeverisë.

Duke komentuar edhe tragjedinë e Gërdecit, shefi i ekzekutivit tha se “të gjithë së bashku përjetuam një tragjedi të tmerrshme. Hetim lidhur me këtë çështje do të vijojnë në qelizë të saj. Hetimi i drejtë, është një detyrim moral ndaj viktimave. Sot po inauguroj projekte në Vorë e cila po rindërtohet. Së shpejti do të inauguroj edhe rrugët e Gërdecit”.