Ahmeti garanton njohjen e Kosovës nga Maqedonia

Lideri i Bashkimit Demokratik për Integrim, Ali Ahmeti, ka deklaruar se Maqedonia do ta njohë pavarësinë e Kosovës në një kohë jo shumë të largët. Në një intervistë për gazetën “Epoka e Re” Ahmeti ka thënë se kjo çështje është trajtuar edhe gjatë bisedimeve me partnerin në koalicion VMRO-DMNE dhe se të gjithë e kanë të qartë qëndrimin e tij.
“Jo vetëm që kam menduar atëherë, por ende mendoj që nuk ka pasur nevojë që unë ta shtroj disa herë këtë çështje. Pa qenë modest e them se unë kam luftuar për pavarësinë e Kosovës dhe këtë të gjitha autoritetet e Maqedonisë e dinë, qofshin në pozitë, qofshin në opozitë. Vetëm një herë është shtruar kjo çështje dhe jemi në drejtim të duhur që në një kohë jo shumë të largët të bëhet njohja e pavarësisë së Kosovës”, ka thënë Ahmeti.

Sipas tij, njohja e Kosovës nga Maqedonia është një çështje që ka të bëjë më tepër me një problem teknik sesa politik – duke aluduar në demarkacionin e kufirit në mes të Kosovës dhe Maqedonisë. “Për fat të keq, kjo çështje ka marrë edhe dimensione politike. Mendoj që në momentin që do të zgjidhet kjo çështje teknike, pra çështja e demarkacionit të kufirit, do të bëhet njohja e pavarësisë së Kosovës”, ka thënë lideri i BDI-së, për të shtuar se, megjithatë, demarkacioni i kufirit nuk është kusht për njohjen e Kosovës nga Maqedonia, por ai duhet të kryhet për të mirën e të dy vendeve.