Wordsworth: Ideja e Serbisë është e gabuar

Ambasadori i Britanisë së Madhe në Serbi, Stephen Wordsworth ka deklaruar se Bashkimi Evropian nuk mund të kushtëzojë hyrjen e Serbisë në BE me njohjen e Kosovës, mirëpo ka shtuar se iniciativa e Beogradit për të kërkuar interpretimin ligjor të shpalljes së pavarësisë së Kosovës është mashtrim i rrezikshëm.
“BE-ja nuk mund t’i vë kusht Serbisë, të cilin nuk e kërkon nga vendet e saj anëtare. Deri atëherë kur disa shtete të BE-së - që ende nuk e kanë njohur Kosovën - nuk ndryshojnë pozicionin e tyre, BE-ja nuk mund të insistojë që Serbia të bëjë një gjë të tillë”, ka thënë Wordsworth për gazetën “Veçernje Novosti”.

Ai ka vlerësuar po ashtu se, ideja për anulimin e pavarësisë së Kosovës është mashtrim i rrezikshëm pasi që, pavarësinë e Kosovës e kanë njohur shumica e vendeve të Unionit dhe shumica e vendeve në Këshillin e Sigurimit.

Ai madje ka shtuar se kjo ide është e gabuar, pasi që kuptohet si sfidim direkt - dhe vetëm sa do të vështirësojë bashkëpunimin dhe integrimin e Serbisë në BE.