Roma dëshiron Cissen dhe ia ndërron kontratën Aquilanit

Roma është afër nënshkrimit me sulmuesin e Marselle, Djibril Cisse. Ndërsa nga ana tjetër pritet shumë shpejt nënshkrimi i kontratës së re të Alberto Aquilanit, e cila i siguron atij 2.5 milionë euro në sezon.
Sipas “Tuttomercatoweb”, giallorosët kanë vendosur ta transferojnë francezin, Cisse, për një çmim prej shtatë milionë eurosh, ndërsa marrëveshja mund të bëhet zyrtare shumë shpejt.

Nga ana tjetër duket se Roma më në fund është pajtuar t’ia ndryshojë kontratën mesfushorit italian, Alberto Aquilani, i cili kishte njoftuar për largim nëse nuk ndryshohet kontrata aktuale, e cila zgjat deri në vitin 2010.

Deri më tani, maksimumi që ofronin kryeqytetasit për Aquilanin, ishin 1.6 milionë euro për sezon, mirëpo pas interesimit të madh të Juventusit dhe Interit për të siguruar shërbimet e tija, romakët kanë vendosur t’ia ndryshojnë kontratën me një pagë vjetore prej 2.5 milionë eurosh e cila do të zgjatë deri në vitin 2013.