Skolari: Dua t'i fitoj të katër trofetë në edicionin e ri

Trajneri i ri i Çelzit, Luis Felipe Skolari, i cili me skuadrën e tij gjendet nëpër një turne në Azi, ka pohuar se dëshiron t'i fitojë të gjitha trofetë e edicionit të ardhshëm. "Edicionin e kaluar klubi arriti tri vende të dyta. Për kriteret e mia kjo është një gjë shumë e madhe", ka theksuar Skolari, i cili në tetë vitet e kaluara ka punuar si trajner i skuadrave kombëtare të Brazilit dhe Portugalisë.
"Këtë edicion do të marrim pjesë në katër aktivitete dhe do të bëjmë përpjekje që t'i fitojmë secilën prej tyre", ka nënvizuar Skolari, duke menduar për trofetë e Ligës Premiere, Ligës së Kampionëve, Kupën e FA dhe Kupën e Ligës. "Është e qartë se kjo do të jetë tepër e vështirë për t'u arritur, por jo e pamundshme. Kemi potencial për një arritje të tillë. Klubi mi ka plotësuar të gjitha kushtet për t'i ndjekur këto trofe", është shprehur Skolari. Në dy ndeshjet miqësore në turneun aziatik, djelmoshat e Skolarit kanë shënuar 11 gola, duke dëshmuar se edhe në edicionin e ri kjo skuadër do të paraqes futboll sulmues. "Parimisht e kam në kokë skuadrën ideale për edicionin e ri, por më duhet edhe pak kohë për të kristalizuar 11-shen më të mirë për ndeshjen e parë kundër Porsmuthit, që zhvillohet më 17 gusht. Tashmë e kam krejtësisht të qartë se cilët do të jenë bartësit e lojës së skuadrës. Kam 20 ditë që jam duke e stërvitur skuadrën dhe kjo periudhë kohore mjafton që ta kuptoj se në cilët futbollistë mund të mbështetem", ka përfunduar braziliani, Luis Felipe Skolari.