Benitez: Ngog dëshiron të përparojë shpejt

Trajneri i Liverpulit, Rafael Benitez është tejet i lumtur me përforcimin e ri të skuadrës së tij, sulmuesin David Ngog, të cilin klubi i kuq e transferoi në radhët e veta për 1.5 milion funta nga Paris Sen Zhermeni.
Benitezi ka pohuar se transferimi i futbollistit 19-vjeçar tek Liverpuli, do t'i jap atij mundësinë e zhvillimit të mëtejshëm, në mënyrë që të bëhet një sulmues të klasit të lartë, edhe pse e pranon se Ngog është paksa larg nga kjo mundësi. Para Liverpulit janë dy ndeshje miqësore ndaj Vilarealit dhe Gllazgou Renxhersit. "Ngog po stërvitet me skuadrën e parë. Ndoshta do ta ketë të vështirë të sigurojë menjëherë një vend titullari, por sigurisht se ai do të mund ta bëjë një gjë të tillë së shpejti. Ai do të jetë i gatshëm për skuadrën e parë për edicionin e ardhshëm. Është një futbollist, i cili dëshiron të përparojë shumë shpejt, kështu që ai do të mësojë dhe pastaj do të sistemohet në ekip", ka theksuar Benitez. Në pyetjen nëse Ngog përgjan me ndonjë prej golashënuesve tipikë të Ligës Premiere, Benitezi ka pohuar. "Ai mund të luaj dhe të vihet në shënjestrën e të tjerëve, por ai nuk është shumë i fortë, pasi ende është i ri. Ai do të përmirësohet, sepse ne po punojmë intensivisht. Ekzistojnë futbollist me kualitete të larta në Angli, por janë tifozët, ata, të cilët do të vendosin nëse ai është si Emanuel Adebajor apo Nikolas Anjelka, apo dikush tjetër".