Penalltia në shtesë i zbardh "faqen" Dinamos

Dinamo Teuta 2 1

Shënues: Ishka 22', Kuli 93+3' / Hysa 60'

Dinamo: Kotorri, Bodrusiç, Pisha (Diop 74'), Graniç, Abraham, Kuli, Poçi, Allmuça, Ishka (Ishka 69'), Vinçetiç, Pollozhani (Ferraj 69')

Trajner: I.Daja

Teuta: Vashaku, Stafa, Dushku, Ahmeti, Buna, Pashaj, Vila (Vieros 62'), Çaushaj, Hysa (Çota 70'), Gjondeda (Kote 86'), Mile.

Trajner: K.Mile

Gjyqtar: L.Jemini (Tiranë), D.Sala (Shkodër), E.Guçe (Lushnjë)

Kartonë të verdhë: Dushku, Hameti (2), Vashaku, Pashaj.

Kartonë i kuq: Ahmeti



8' Kuli tenton nga distanca, por iniciativa e kavajasit ka përfunduar në krahun e djathtë të portës mike.

9' Poçi tenton në të njëjtin pozicion me Kulin, por gjuajtja e fierakut ka qenë një fotokopje e asaj të Kulit.

11' Hysa tenton në hyrje të zonës, por Kotorri pret pa problem.

14' Bodrusiç tenton me të djathtën, por Vashaku lehtësisht.

16' Pollozhani, nga një goditje standarde, kërkon të surprizojë portierin mik Vashaku, por durrsaku është i sigurt në ndërhyrjen e tij, duke e neutralizuar gjuajtjen e tij.

22' Vinçetiç hedh një top në zonë dhe, pas një gabimi të mbrojtjes durrsake, Ishka brenda zonës përfiton dhe me të majtën godet saktë, duke kaluar Dinamon në avantazh. 1-0.

28' Mile brenda zonës godet fuqishëm me të djathtën, por jashtë kuadratit blu.

30' Kuli hedh një top brenda në zonë dhe aty Dushku, në tentativë për ta larguar, rrezikon autogol në portën e tij.

37' Ishka jep një pasim perfekt për Allmuçën, i cili brenda zonës kërkon të surprizojë Vashakun me një parabël, por iniciativa e tij ndalet nga portieri mik.

38' Stafa brenda zonës i ka të gjitha mundësitë të barazojë, por godet në mënyrë të pasaktë jashtë.

40' Kuli i rrëmben një top Vilës dhe futet bukur në zonë, duke lëshuar një goditje potente, por që ndalet vetëm nga traversa e kuadratit durrsak.

52' Mile godet me të djathtën nga larg, por mbi traversë.

57' Çaushaj kroson për Hysën, por ky i fundit pranë portës godet me kokë jashtë.

60' Hysa futet bukur brenda në zonë dhe pason tek Mile, ndërkohë që pas një karamboli topi kthehet tek Hysa, që nuk e ka të vështirë ta kalojë në rrjetë dhe të barazojë rezultatin në 1-1.

63'- Ahmeti ndërhyn brutalisht ndaj Vinçetiçit dhe për kryesorin Jemini është kartoni i dytë i verdhë dhe automatikisht i kuq për të.

66' Pisha godet brenda zonës, por jashtë.

72' Pema tenton me "gërshërë" dhe topi ndalet nga një mbrojtës. Dinamovitët pretendojnë për 11 metërsh.

74' Pema godet fuqishëm dhe Vashaku ka pritur në dy kohë.

78' Allmuça tenton brenda zonës, por ndërhyn mbrojtja dhe Vinçetiç godet më pas në mënyrë të pasaktë jashtë.

83' Allmuça tenton me të djathtën, por gjuajtje e tij përfundon ngjitur me shtyllën e djathtë pingule të Vashakut.

88' Allmuça këtë herë më kokë ka "qethur" traversën e Teutës.

90+3'- Rrëmujë brenda zonës së Teutës, Allmuça godet fuqishëm dhe aty Pashja e ka ndalur topin me dorë, për kryesorin Jemini është 11 metërsh. Kuli ekzekuton saktësisht dhe 2 1 për Dinamon në sekondat e fundit të ndeshjes.



Deklarojnë

Ilir Daja, trajner i Dinamos: "Ishte një fitore shumë e mundimshme dhe jam shumë i pakënaqur nga futbollistët e mi për atë që shfaqën në fushë. Përveç problemeve taktike, kemi pasur edhe mungesë të shpirtit të garës. Gabimet në këto momente që jemi nuk na tolerohen. Sigurisht që faji nuk është vetëm i futbollistëve. Duhet të gjejmë elementet motivuese për skuadrën, në mënyrë që të mos zhvillojmë më ndeshje të tilla."

Kristaq Mile, trajner i Teutës: "Kishim ardhur këtu për të mos dalë pa pikë, ndërkohë që duhet parë edhe pozicioni i gjyqtarit në këtë takim, sepse jemi një skuadër me elementë të rinj dhe vetëm mungesa e eksperiencës bën që të ndërhyjnë në atë mënyrë. 11 metërshin nuk dua ta komentoj, por për shtesën dhe gjykimin në tërësi kam rezervat e mia."



Të veçanta

Në tribunën "VIP" ishin të pranishëm shumë figura të njohura të futbollit shqiptar, si Miço Papadhopulli dhe Vasil Bici. Ndërkohë, të pranishëm ishin edhe dy presidentët e skuadrave respektive, Besnik Sulaj dhe Edmond Hasanbelliu.

Në pjesën e dytë, në tribunën kryesore të stadiumit "Selman Stërmasi" ka plasur një sherr masiv midis tifozërive. Vetëm ndërhyrja e policisë ka bërë që situata të qetësohet, pasi janë shoqëruar disa persona për në komisariat.

Edhe një herë ndeshja midis Dinamos dhe Teutës ka përfunduar në rezultatin 2 1, duke u zgjidhur në minutat e fundit.





Komenti

Dinamo ka fituar me shumë mundim, duke siguruar kështu vendin e parë në javën e 25-të të kampionatit. Blutë kryeqytetas e kanë nisur mjaft mirë, duke kaluar në avantazh me anë të Ishkës dhe në të gjitha momentet këtij fraksioni kanë pasur në dorë frenat e lojës. Teuta kërkon të kundërsulmojë me anë të Miles dhe Hysës, por përballë tyre është një mbrojtje tepër e sigurt dhe me eksperiencë. Në mungesë të Pejiçit të skualifikuar, trajneri Daja ka hedhur në fushë një formacion me shumë mesfushorë, ndërkohë që Poçi luan më i avancuar përkrah Pollozhanit, Ishka dhe Allmuça formojnë dyshen e qendrës në mesfushë.

Në pamje të parë, ndeshja u duk sikur do të kishte vetëm një protagonist, por në pjesën e dytë, falë grintës së skuadrës durrsake, rrjedha e takimit do të ndryshojë kur në minutën e 60-të talenti tiranas Hysa do të ndëshkojë dinamovitët pas një aksioni të gjatë të "djemve të detit". Që nga ky moment, edhe pse pankina blu bën lëvizjet e radhës, duke aktivizuar Pemën, Ferrajn dhe Diopin, asgjë nuk do të ndryshojë në motivimin e skuadrës kryesuese. Më pas, një ndërhyje brutale e Ahmetit në dëm të Vinçetiçit bën që gjyqtari kryesor Jemini të ndëshkojë me kartonin e dytë të verdhë mbrojtësin e ri durrsak. Teuta luan me një lojtar më pak për disa minuta, ndërkohë që Dinamo shfaqet e pafuqishme për të goditur kuadratin e mbrojtur nga Vashaku. Një lojë e vakët karakterizon futbollistët blu deri në sekondat e fundit të takimit. Pema dhe Allmuça do të përpiqen shumë për të gjetur golin e fitores, por ai do të vijë në momentin që të gjithë në stadiumin "Selman Stërmasi" ishin pajtuar me rezultatin 1 1. Në minutat shtesë të takimit Ferraj harkon bukur nga e majta dhe aty Pema tenton të godasë dhe ndërpritet nga mbrojtja durrsake, por Allmuça është i shkathët dhe godet fuqishëm, ndërkohë që gjuajtja e tij ndërpritet nga dora e Pashajt, sipas kryesorit Jemini, i cili ndëshkon dhe me kartonin e verdhë mbrojtësin bregdetar dhe akordon 11 metërsh në favor të Dinamos. Kuli merr përsipër ekzekutimin e 11 metërshit dhe godet saktësisht, duke kaluar në avantazh Dinamon në sekondat e fundit 2 1. Entuziazëm në kampin blu, kur edhe një herë është përsëritur historia e ndeshjes së javës së 15 të, kur Dinamo përmbyste gjithçka "in extremis". Tashmë, edhe pse fitorja ishte tepër e vuajtur, rëndësi për skuadrën e Dajës ka 3 pikëshi tepër me vlera, që e ngjit skuadrën blu në krye të klasifikimit, në kuotën e 51 pikëve, kundrejt 49 të Partizanit. Në ndeshjen e ardhshme Dinamo do të përballet me Kastriotin e Krujës, ndërkohë që Partizani ka një transfertë tepër të vështirë përballë Flamurtarit të Vlorës.