Ronaldinjo: Te Barcelona kam ndjerë kënaqësi

Përforcimi më i ri i Milanit, Ronaldinjo, ka vendosur që t'i përshëndetes tifozët e Barcelonës nëpërmjet një letre. "Para se gjithash dua të them se sa i jam falënderues tifozëve të Barcelonës. Çdo moment që e kam kaluar atje më ka bërë të ndjehem i lumtur, kurse kur nuk isha në formën e duhur tifozët më jepnin forcë", thuhet në letrën e Ronaldinjos.
Ylli brazilian luajti në "Nou Camp" plotë pesë vjet. "Kam ndjerë kënaqësi duke luajtur për Barcelonën dhe gjithmonë kam dëshiruar që të njëjtën ndjenjë ta përcjell edhe tek tifozët. Tashmë kam nënshkruar për një klub të madh, por më duhet të them se e kam braktisur me një pikëllim të madh vendin i cili më solli aq shumë momente të mira dhe gëzimi në karrierë", thuhet më tej në letrën e Ronaldinjos. Braziliani u ka shprehur falënderime të gjithë bashkëlojtarëve, trajnerëve, stafit mjekësor dhe zyrtarëve tjerë të cilët kanë punuar në klub dhe kanë marrë pjesë në sukseset e mëdha në pesë vitet e kaluara. "Kam qenë i lumtur me Barcelonën. Ky klub dhe qytet gjithmonë do të mbeten në zemrën time", ka shtuar më tej Ronaldinjo. Krejt në fund, ai ka sqaruar se si e sheh ai futbollin si lojë: "Ne brazilianët luajmë futboll që t'i kënaqim njerëzit dhe për këtë arsye jam i lumtur për atë që kam bërë te Barcelona. Futbolli është lojë, argëtim dhe një sport për kënaqësi. Futbollin duhet ta luash me buzëqeshje. Ky është futbolli sipas meje. Falënderoj të gjithë ata që kanë buzëqeshur së bashku me mua në "Nou Camp'", ka përfunduar Ronaldinjo.