Altin Lala - 10 vjet me Hannoverin

Mesfushori shqiptar Altin Lala, do të ketë një sezon më të veçantë tek klubi gjerman Hannover, kapiteni i kombëtares shqiptar do të luajë sezonin e dhjetë të tij me klubin e Bundesligës.
Megjithëse për sezonin e dhjetë tek Hannoveri, 32-vjeçari shqiptar thotë se ende ka kohë për të qëndruar në fushë, ndërsa më pastaj preferon të jetë pjesë e stafit drejtues të këtij klubi.

“Kam kohë deri në moshën 34-vjeçare, pastaj do të jem diku në stafin drejtues të klubit. Trajner nuk besoj se do të bëhem ndonjëherë, sepse nuk më pëlqen. Arsyeja është e thjeshtë: ke në dispozicion 25 lojtarë, por vetëm 11 prej tyre do të luajnë, të tjerët më pas fillojnë dhe të urrejnë", ka thënë Lala për gazetën lokale të Hanoverit, "Hannoversche Allgemeine".

Megjithëse nuk është më një djalosh i ri, shtatshkurtri shqiptar cilësohet ndër më të mirët në rolin e tij prej mesfushori shkatërrues në Bundesligën 1.

"Në pozitat që jam, përvoja është tepër e rëndësishme. Edhe pse luaj prej dhjetë vjetësh te Hannoveri, mendoj se kam ende për të mësuar. Gjithmonë dëgjoj me vëmendje kërkesat e trajnerit dhe mundohem t'i realizoj detyrat e mia me përpikmëri", shton Lala.

Ai shquhet për lojë të ashpër, por vetë ai asnjëherë nuk e ka pësuar nga dueli me të tjerët. Edhe në këtë element të lojës është perfekt.

"Peshoj vetëm 60 kilogramë dhe deri më tani askush nuk ka arritur të më dëmtojë në dyluftime. Është e pabesueshme", tha ai.

Ai te Hannoveri është transferuar në korrik të vitit 1998 nga skuadra e rangut të ulët Borusia Fulda. Me Hannoverin ka kontratë deri në qershorin e vitit të ardhshëm. Deri tani është aktivizuar në 264 ndeshje dhe ka shënuar dhjetë gola (një në Bundesliga).

Me Kombëtaren e Shqipërisë, Lala ka realizuar 63 ndeshje dhe ka shënuar tre gola.

Disa ditë më parë, para ndeshjes miqësore me Porton (1-1), bosi i Hannoverit, Martin Kind, i dhuroi Lalës një buqetë me lule për dhjetëvjetorin e tij në klub. Padyshim që një buqetë edhe më të madhe, Lala do ta marrë kur të varë këpucët në gozhdë pas dy vjetëve. Për këtë janë të sigurt të gjithë. Edhe vetë Lala. /sporti shqiptar/