KFOR nuk lejon eskalimin e situatës në Mitrovicë

KFOR-i ka premtuar se do ta kryejë pjesën e mbetur të kanalit për futjen në funksion të ujësjellësit të Suhadollit, me gjithë kundërshtimin e serbëve lokalë.
Komandanti i kontingjentit francez të KFOR-it, Claude Mathey, i cili ndodhej në Suhadoll për të inspektuar situatën në terren, ka premtuar se punimet do të nisin së shpejti, sipas të gjitha gjasave, sot.

Nga ana tjetër, banorët shqiptarë, të cilët kanë mbetur peng i protestave politike të fqinjëve të tyre, thonë se do të presin disa ditë që KFOR-i t’i përmbushë premtimet, para se të marrin hapa më radikalë.

Ndërkohë protestat herë të njërit, e herë të tjetrit komunitet vazhdojnë ta mbajnë situatën të tensionuar në Mitrovicë. Shqiptarët në jug ka disa ditë që me protesta kërkojnë largimin e maunave nga parku industrial i “Trepçës”, që përmbajnë vaj të rrezikshëm për shëndetin. Nga ana tjetër, serbët e Suhodollit me bllokim rrugësh vazhdojnë të kundërshtojnë ndërtimin e ujësjellësit, nga i cili do të përfitonin të të dyja komunitetet. Autoritetet e rendit, thonë se aktualisht kanë situatën nën kontroll.

"Si zakonisht KFOR-i mund të përballojë çdo problem, por ne dëshirojmë që çdo gjë të jetë e qetë. Ne duhet t’ua shpjegojmë serbëve se edhe ata do të përfitojnë nga ujësjellësi", ka thënë zëdhënësi i KFOR-it francez Guillaume Courot, duke sqaruar se si sigurinë, ashtu edhe punët në shtrirjen e gypave në fshatrat e banuar me serbë e ka marrë përsipër KFOR-i. /Kohavision