Sejdiu: Takimi me Bushin kulmim i qëndrimit të SHBA-ve ndaj Kosovës

Presidenti i Kosovës, Fatmir Sejdiu duke komentuar takimin e nesërm me presidentin amerikan George Bush, në Shtëpinë e Bardhë - në Washington, tha se ky është kulmimi i qëndrimit të SHBA-së ndaj Kosovës dhe ndaj qytetarëve të saj. Këto komente Sejdiu i bëri në një intervistë me seksion shqip të Zërit të Amerikës.
Duke u përgjigjur në pyetjen për pritjet nga takimi i nesërm me presidentin Bush, presidenti Sejdiu u shpreh se është kulmimi i qëndrimit të SHBA-së ndaj Kosovës dhe ndaj qytetarëve të saj. Sejdiu tha se në të njëjtën kohë është një rezultat i jashtëzakonshëm dhe njohje e punës që ne kemi bërë, në partneritet të vazhdueshëm dhe të thellë, në ecjen e gjatë, të rëndësishme dhe jo të lehtë që ka pasur Kosova.

“Ne presim që Presidenti Bush të mbështesë këtë qasje që ne kemi pasur, sepse sinjalet janë rezultat i bashkëpunimit të thellë të deritanishëm, e nga ana tjetër të kemi zotimin për mbështetjen e mëtejshme të zhvillimit të Kosovës”, theksoi presidenti Sejdiu.

Ai tha se ky takim do të hapë horizonte të reja, që kanë të bëjnë posaçërisht me rigjenerimin e Kosovës, por dhe me aspektet e tjera që lidhen me demokracinë, sigurinë dhe me integritetin e plotë territorial të Kosovës. /RTK/VoA/